பிரும்மரகசியம்!

சொல்வதற்கு எதுவுமில்லை
இனி உன்னிடம்.

சொன்னால்தான் காதல்
பூரணம் பெறும்
என்பதிலும் உடன்பாடில்லை
எனக்கு.

சொற்களால் மட்டுமே
புரியவைத்துவிட முடியாது
வாழ்க்கையை.

யாசித்துப் பெறுவதில் இல்லை
யோசித்துப் புரிதலில் உள்ளது
நேசம்.

உள்ள(த்)தை வெளிப்படுத்த
உனக்கு வெட்கமெனில்
எனக்கோ தயக்கம்.

உணர்வுப் பின்னல்கள்
உந்தித் தள்ள
அதன் வெளிப்பாடாய்
நிகழ்வதென்னவோ
செயல்களாலும்
செய்கைகளாலுமான
மெளன மொழி மட்டுமே.

எல்லாம் தெரிந்த சிவனும்
குமாரனிடம் மெளனமாக
பிரும்ம ரகசியம் கேட்டதை
யோசித்துப் பார்.

அவ்விதமாகவேனும்
காதலை
வெளிப்படுத்த
நீ தயார் எனில்,
ஒன்றும் தெரியாததுபோல
நானும்
அந்த பிரும்ம ரகசியத்தை அறிய
என் காதை
உன் உதட்டருகில்
கொண்டுவர
உத்தேசமாய் இருக்கிறேன்.